Poezia është krijuar për të treguar një botë tjetër, një botë të re, një botë të krijuar nga poeti. Poeti Përparim Blakaj nga poezia në poezi tregon një ngjarje, një tregim, një histori, një botë të re. Si çdo organizim gjuhësorë vepra poetike ka një ngjarje rreth së cilës poeti trajton një botë të tërë. Botë rinore, frymëzime rinore, botë aktuale, frymëzime studentore. Vepra poetike ka një krijim interesant që shpeshherë mund të fillohet si një ide krejt spontane dhe hap pas hapi merr formë tipike poetike; janë ndjenjat njerëzore, uni poetik, idetë poetike, idetë krijuese që e bëjnë të tillë. Duke qenë se krijimi letrar realizohet shkronjë pas shkronjë, fjalë pas fjale, vepra poetike jep një mesazh të qartë lexuesit, dhe përmes kësaj vepre poetike poeti Përparim Blakaj i jep lexuesit mesazhe kohore, mesazhe të qarta për të djeshmen, të tashmen dhe të ardhmen.
Poezitë moderne të poetit Përparim Blakaj do t’i qëndrojnë kohës si të tilla, pasi janë ndjenjat e poetit që poezinë e tij e bëjnë të jetojë gjatë. Tekstet poetike të poetit të ri dhe shumë premtues janë të lidhura me fragmente të konceptuara si një zhvillim normal artistik, në to gjejmë heronj, optimistë, pesimistë, ngadhënjimtarë, shpresëdhënës dhe diku – diku dramë.
E përditshmja e realitetit shqiptar merr pjesë aktive në poezitë e tij, ku hasim konflikte kohore, individuale, sociale të para nga syri i tij vrojtues i poetit i cili më pas këto ngjarje, këto historira i kthen në poezi, dhe kështu na ofron një këndvështrim krejt personal duke na thënë që ky është vetëm një fillim.
Related Post
Karakteri i poezive të poetit Përparim Blakaj është shumëdimensional, mjafton t`i lexojmë poezitë e tij, ai rrugëton me to nga vendi në vend, nga qyteti në qytet, nga fshati në fshat, nga krahina në krahinë, nga koha në kohë duke vazhduar pandalshëm rrugëtimin e tij poetik.
Pena e autorit nuk do të ndalet me magjinë e saj. Ky emër i këtij djaloshi ambicioz dhe shumë premtues në të ardhmen do të bëhet shumë i njohur me poezitë, shkrimet, tregimet për të gjithë ne. Hapin e parë krijues artistik e bëri me libri ”Përtej syve” duke na ofruar risi poetike e tematikash krijuese letrare, e ardhmja është para tij, ajo flet për të. Nëpërmjet kujtimeve të së kaluarës, ngjarjeve të sotshme dhe imagjinatës për të ardhmen poetët kanë bërë mrekullira, pasi nga këto tri elemente të rëndësishme janë frymëzuar mijëra poetë botërorë, edhe poeti Përparim Blakaj do të na sjell vepra të mirëfillta poetike që do të vlerësohen nga lexuesit dhe kritikët letrarë./Dr. Faton Krasniqi
